pARTisan і "Невядомая Беларусь" у Магілёве

Сумесная прэзэнтацыя восьмага нумару альманаха сучаснай беларускай культуры pARTisan і кнігі аналітычных эсэ “Невядомая
Беларусь” адбудзецца 3 красавіка а 18.30 у будынку грамадскага цэнтру “Кола сяброў” (Магілёў, зав. Чкалава, 16).
Тэма чарговага нумару часопіса – вера. pARTisan не абмяжоўваецца адно рэлігійным вымярэньнем тэмату і робіць спробу канцэптуалізаваць фэномэн веры ў розных накірунках, ствараючы паліфанічную візію на праблему – ад сакральнага “жыць (з) верай” да прыватнага “быць Верай”.
Таксама pARTisan прадставіць арт-альбом “Дванаццаць” Артура Клінава – першы з новай сэрыі “Калекцыя пАРТызана”, заснаванай альманахам дзеля прамоцыі актуальнага беларускага мастацтва.
Кніга "Невядомая Беларусь" – складанка аналітычных эсэяў, што прэзэнтуюць нашую краіну, убачаную вачыма ня толькі беларусаў, але і суседзяў - палякаў і расейцаў. Сярод аўтараў - Алесь Анціпенка, Уладзімер Арлоў, Сяргей Дубавец, Валянцін Акудовіч, Аляксей Сіманаў, Рышард Радзік і іншыя.
У імпрэзе возьмуць удзел мастак Артур Клінаў, паэт Андрэй Хадановіч, філёзаф Алесь Анціпенка і культуроляг Максім Жбанкоў.
Імпрэза пройдзе ў межах кампаніі "БУДЗЬМА!".